SXGQ

A Sociedade Xuvenil Galega de Química é unha asociación xuvenil sen ánimo de lucro que promove a divulgación da ciencia, cun foco especial na química, empregando a nosa lingua. Entre os nosos obxectivos está espertar a curiosidade científica nos máis cativos e contribuír á erradicación da quimiofobia tan estendida na nosa sociedade.

Fundada no 2016 por un pequeno grupo de amigos, a SXGQ conta hoxe con máis de 50 membros, entre estudantes de grao, máster e doutoramento, unidos pola paixón pola divulgación. Na nosa comunidade non só hai químicos; tamén contamos con biólogos, farmacéuticos e outros perfís que enriquecen o noso proxecto.

Desde a nosa sede en Santiago de Compostela, viaxamos por toda Galicia para achegar a química á sociedade. Levamos obradoiros a colexios e institutos, así como a feiras científicas. Nestes eventos, montamos o noso tenderete con múltiples experiencias científicas para tódolos públicos. Podes explorar tódolos lugares onde deixamos pegada no noso mapa interactivo!

Os nosos valores

A filosofía da SXGQ baséase en tres piares fundamentais:

• Divulgación científica. Achegar a química á sociedade, dende a infancia ata a idade adulta, fomentando o pensamento crítico e superando prexuízos como a quimiofobia.
• Ciencia en galego. Destacar a calidade da investigación feita en Galicia e demostrar que se pode divulgar en galego con excelencia.
• A muller na ciencia. Recoñecer e visibilizar o papel das mulleres que abriron camiño na ciencia, inspirando ás novas xeracións.

Na SXGQ, tódalas persoas membros compartimos unha paixón común pola química e pola divulgación científica. A maioría somos estudantes universitarias, unidas por uns intereses comúns: a ciencia e a nosa lingua, o galego!

Cada ano, novas persoas interesadas en aprender e colaborar únense á nosa iniciativa, onde cada integrante desempeña un rol esencial. Estruturámonos en grupos de traballo, guiados pola directiva, para alcanzar as nosas metas e facer que cada proxecto sexa único.

Queres coñecer á actual directiva?

Yeray Folgar
Presidente

Estudante de doutoramento en Ciencia e Tecnoloxía Química na USC. Centrado na entrega de compostos bioactivos a células, desenvolve a súa actividade investigadora en química biolóxica no CiQUS. Ademais da súa paixón pola divulgación científica, tamén disfruta coleccionando insectos, minerais e fósiles.

Alejandro Rodríguez
Vicepresidente

Estudante de Química e Bioloxía na USC. Inquedo e curioso, gústalle preguntarse o porqué das cousas. Desfruta xermolando sementes e creando cousas coas maos. Ama as abellas.

Patricia Fulias
Secretaria

Estudante de doutoramento en Ciencia e Tecnoloxía Química na USC. O seu traballo céntrase no desenvolvemento de novos fluoróforos e tamén no estudo do novos transportadores celulares no CiQUS. Nos seus ratos libres gústalle bailar, aprender sobre política social e fedellar no mundo da repostería.

Ana Seijas
Tesoureira

Tras rematar o dobre grao en Bioloxía e Química saltou a un mestrado de Nanobiofotónica Molecular. Encántalle pasar tempo no laboratorio cacharreando. Gústalle achegar a ciencia á sociedade. Apaixoada da natureza e da fotografía.

Adriana Barros
Vogal

De Santiago de Compostela e graduada en Química. Encántalle a ciencia como ferramenta para explicar fenómenos cotiás e mellorar o noso día a día. Namorada do mar e aficionada á natación.

Bea Lista
Vogal

De Malpica de Bergantiños. Graduada en Bioloxía e en Química. Desfruto moitísimo o proceso que leva consigo a divulgación científica. Ademais da ciencia, encántame o deporte. Concretamente, xogo ao fútbol sala.

Marta Vélez
Vogal

Graduada en química e bioloxía e actualmente cursando o máster de profesorado. Leva dende pequena interesada pola ciencia e agora quere compartir a súa paixón cos demais.

Sergio Serantes
Vogal

Graduado en Bioloxía e Química pola Universidade de Santiago de Compostela, mestrado en Biotecnoloxía Molecular pola Universidade de Barcelona. Estudante de doutoramento en Ciencia e Tecnoloxía Química, avaliando as propiedades antitumorais de estruturas peptídicas supramoleculares.

...e moitas máis!

A directiva cumpre un rol esencial na coordinación, pero no laboratorio e nas actividades tódolos membros contribuímos por igual. A SXGQ destaca por ser unha comunidade diversa e acolledora, onde é posible colaborar a gusto, aprender unha chea de cousas e desfrutar dunha experiencia única!

Aquí atoparás unha mostra das nosas actividades e momentos compartidos. Explora as imaxes e descobre o que facemos!

Obradoiros en colexios: inspirando futuros científicos

❮ ❯

Feiras científicas: a química ao alcance de todos

❮ ❯

Eventos e actividades: vivencias que conectan ciencia e sociedade

❮ ❯

Asembleas: traballando xuntos por un obxectivo común

❮ ❯

Explora o mapa interactivo da SXGQ para ver os lugares que visitamos ao longo dos anos. Cada marcador identifica un Obradoiro, con cores que indican as diferentes datas dende o inicio da nosa traxectoria. Bótalle unha ollada ao noso percorrido e descobre onde deixamos pegada!

Gustaríache ter un Obradoiro no teu colexio? Tes algunha idea, comentario ou suxerencia que poidamos satisfacer? Quererías entrar a formar parte do noso equipo para participar nas actividades dende dentro? Para calquera cousiña que desexes, podes poñerte en contacto connosco a través deste formulario (ou escribindo directamente a sxgquimica@gmail.com se o prefires).

Sentímolo moito, pero actualmente estamos á capacidade máxima para os Obradoiros do actual curso académico. As solicitudes recibidas a partir de agora serán consideradas para o primeiro semestre do curso 2025/2026. Moitas grazas pola vosa comprensión!

Cando nos envías unha mensaxe a través de este formulario, o teu nome e dirección de email empréganse exclusivamente para que podamos poñernos en contacto contigo e contestarche. Aquí tes dispoñible a nosa política de privacidade, por se queres ler máis.