QUEN SOMOS?


Descubre a nosa estrutura!

A SXGQ está integrada por persoas con grande interese na ciencia. Moitos de nós somos estudantes universitarios vinculados á área da química. Tod@s temos en común unha grande paixón pola química e polo galego!

Cada ano máis xoves con interese na ciencia se incorporan ao noso proxecto. Cada un de nós xoga un rol crucial, e organizámonos en grupos de traballo coordinados polos membros da directiva. Queres coñecernos? Continúa lendo!

Jesús Bello, presidente

Estudante de doutoramento en Química Orgánica na USC, leva a cabo o seu traballo de estudo de novas metodoloxías catalíticas para a síntese de novos materiais no CiQUS. Namorado dos días de choiva, das tormentas e do coco.


Isabel Velo, vicepresidenta

Estudante de Doutoramento en Ciencia e Tecnoloxía Química na USC. Desenvolve a súa actividade investigadora na Facultade de Química no campo da bioinorgánica. Organización de actividades e xestión de redes.


Adriana Barros, secretaria

De Santiago de Compostela e graduada en Química. Encántalle a ciencia como ferramenta para explicar fenómenos cotiás e mellorar o noso día a día. Namorada do mar e aficionada á natación.


Ana López, tesoureira

Organiza a economía da Soci.


...e moit@s máis!

A directiva é importante para a coordinación, pero no laboratorio e na rúa tod@s aportamos por igual. A Soci está chea de grandes persoas coas que podes traballar a gusto, aprender moitísimo e pasalo de marabilla!


Quererías formar parte do noso equipo? Escríbenos un email presentándote!

Apúntate

QUE FACEMOS?


Coñece o noso traballo

Somos unha asociación sen ánimo de lucro formada por moz@s estudantes e científic@s con moito interese na investigación e compromiso coa divulgación. O noso obxectivo é transmitir a ciencia á sociedade, axudando a difundir a investigación que facemos en Galicia, divertindo, sorprendendo, ensinando e aprendendo moito no proceso.

Entre as nosas principais actividades atópanse os obradoiros en colexios. Acordamos unha data e aparecemos alí cos nosos experimentos e demostracións, abraiando a alumnado e profes por igual.

Outro dos nosos enfoques é a participación en feiras e congresos de ciencia, tecnoloxía, divulgación... Xa somos habituais na Maker Faire Galicia e en Innovames! Poderás atoparnos atendendo postos cheos de experiencias sorprendentes, amosándoas e explicándoas a quen queira que se achegue con interese.

De cando en cando organizamos charlas, exposicións, xuntanzas, participamos en actividades das universidades e dos centros de investigación... Unha boa parte de nós somos investigadoras e investigadores, ao fin e ao cabo, ese é o noso día a día!

E pouco a pouco imos gañando terreo nas redes sociais... Cada vez estamos máis activ@s nelas! Asegúrate de seguirnos nos enlaces de arriba da páxina. ;)


Gústache o que les? Envíanos unha mensaxe e falamos!

Contacta connosco

GALERÍA


Algunhas das nosas fotos

img1

CONTACTA CONNOSCO


Escoitámoste

Gustaríache ter un obradoiro no teu colexio? Tes algunha idea, comentario, suxerencia que poidamos satisfacer? Quererías entrar a formar parte do noso equipo e participar nas nosas actividades dende dentro? Para calquera cousiña que desexes, podes poñerte en contacto connosco a través deste formulario (ou escribindo directamente a sxgquimica@gmail.com se o prefires).

Estou de acordo con que a SXGQ empregue a miña dirección de email para poñerse en contacto conmigo.

Cando nos envías unha mensaxe a través de este formulario, o teu nome e dirección de email empréganse exclusivamente para que podamos poñernos en contacto contigo e contestarche. Aquí tes dispoñible a nosa política de privacidade, por se queres ler máis.

Calendario


Atopa aquí todos os nosos eventos.